凡香港人去日本買樓投資的,都沒有資格罵中國人蝗蟲

今日朝早睇到某日本旅遊討論區有網友在淺草雷門從旁邊拍得一張懷疑、相信係香港人嘅旅行團合照,橫額上面寫「2017日本房地產邊玩邊食邊投資 世紀21中華物業東京大阪睇樓團」。

有香港人會大大聲講: 「我成日去東京、大阪喪食喪玩喪買,日本依家旅遊靠曬我地,你睇下新聞都話每四個香港人就有一個去日本旅行,我對日本熟悉嘅程度仲熟過旺角架!」

「成日搵酒店好麻煩嘅,所以我諗住去日本投資。你都知香港啲樓幾貴,喺嗰邊買間屋平日放租地產代理都話係投資最好方法啊!「

「使乜驚語言問題?做airbnb平日租返比香港人大家同聲同氣,其他香港人又可以平平哋去旅行,咁有咩唔好姐?」

大家試吓將「香港人」換成「中國人」,「東京大阪」換成「香港」,就會知道其實你一種思維同香港人口中最鍾意大大聲鬧嘅「蝗蟲」完全冇分別。

你幻想下你屋企隔離個單位俾個大陸人買咗拎去租比大陸嘅同胞或者大陸留學生,日日有唔識嘅人進進出出,夜晚仲可能好大聲開電視又或者用洗衣機洗衫,你會好憤怒咁話「香港啲樓唔係俾你地咁樣用架!」咁調返轉將心比己,你有冇覺得去日本買層樓然後租返比香港同胞係非常仆街嘅行為先?

大陸人去香港購物可能每個星期一次,隨時多過你去東京大阪,咁佢哋喺香港置業都理所當然。你做乜話人哋推高樓價同埋搞到個地方越嚟越雜先?人哋對旺角嘅熟悉可能仲高過你喎!香港經濟唔好都係佢哋來投資同埋消費喎!

將心比己真係好重要。去投資仲拎住條咁樣嘅橫額去人哋神社門口影相,我只有一句話:柒到冇朋友。

Related Posts

by
香港旅遊及生活部落客歷7年、曾多次受邀到日本及台灣採訪,​以日本深度遊、各種藝術文化交流、日本社會學等等個人分享及見解深受各個年齡層喜愛日本的人士歡迎。著有《Kiri的東瀛文化觀察手帳》。
Previous Post Next Post

Leave a Reply

Your email address will not be published. Required fields are marked *

0 shares