【2017香港美食博覽和風襲來】一網打盡日本美食、免費試食試飲推介(含攤位編號懶人包攻略)

每年都係香港盛事嘅美食博覽好快又要開始,今次參加左貿發局提早一個月舉行嘅記者招待會,親身為各位搜羅美食資訊!我知道大家嘅媽咪可能好關心一蚊鮑魚,但係對於我同埋呢個網站嘅讀者,日本食物先至係我哋最有興趣㗎嘛 !所以以下就會為各位介紹2017年香港美食博覽日本食品相關資訊。

 

今次日本成為2017香港美食博覽嘅合作夥伴,得到日本官方「日本畜產物輸出促進協議會」(5B-C30)鼎力支持,以和牛、日本豬、日本雞蛋、日本牛奶、日本雞肉為五大宣傳賣點。

我隨便問咗幾個單位,都發現全部可以喺美食博覽有免費試食!係免費試食呀!當日我行到去嘅時候啱啱好派完,轉頭返嚟又有すき焼き食啦,而且係來自鹿兒島嘅牛肉,都不知幾香滑。
除咗大家都好鍾意食嘅牛之外,豬肉同雞肉都會有日本師傅專程為大家精心烹調。唔唔過嚟支持下影張相放上網推廣大家以後要食多啲日本食材,點對得起日本咁多師傅專程來香港推廣佢哋國家嘅美食啊?
除咗食肉之外仲有使用日本各地嘅食品包括米、調味料、各種乾貨製作出嚟嘅小食都可以免費試食,例如有蛋撻同埋豬頸肉都非常受歡迎。話說到時大家品嚐嘅美食都係ABC Cooking Studio嘅大美女團隊負責烹調製作,佢哋話美食博覽都會出現為大家精心製作美食,但係就冇今日個飯團食喇⋯
以下見到嘅美食都係美食博覽嘅時候可以免費品嚐嘅,大家記住多多支持「日本畜產物輸出促進協議會」(5B-C30)呀!
除咗日本官方嘅攤位之外,仲有幾個日本酒同日本有趣食品嘅攤位想為大家介紹一下。
如果鍾意日本酒嘅話,可以去「酒魂有限公司」(3B-A07)免費品嚐美酒或者用$50一杯嘅價錢試吓佢哋嘅得意推介。我今日試飲左嘅係來自秋田嘅酒以及山崎嘅梅酒,都係免費架!山崎嘅梅酒美食博覽$200有找,大家不妨考慮一下長放屋企招呼朋友。
我問老細會唔會有啲東北嘅日本酒,佢話有啲客人都希望振興東北經濟,所以佢哋除咗秋田嘅之外福島嘅產品佢哋都會有。各位可以到時留意一下,美食博覽一樣可以支持東北經濟架!
如果話拎住咁多酒好辛苦買唔到都唔緊要,我已經問埋佢哋有網上商店,送貨去香港工商業地址$800以上免郵費,就算買唔夠$800郵費都係$30。
如果講得意嘅美食要送俾朋友或者自己開心吓嘅話,首先梗係推介Red Gold (HK) Limited (1D-A30)嚟緊萬聖節非常適合嘅即食麵。呢個北海道即食麵非常盞鬼,應該係香港首次見到,美食節推出試水溫第到冇得賣㗎。
講起即食麵嘅話,日清係香港嘅深入民心程度隨時超越日本本國。率先俾各位欣賞下佢哋今年嘅禮物包,唔知大家會唔會有興趣呢?
跟住落嚟要介紹嘅係日本雜貨品牌Felissimo貓部日本師傅人手製作獨一無二貓貓棉花糖。Kwok Nung Trading Limited (3B-F06)並唔係第一次將棉花糖貓貓大比一種愛貓人士,原來係太古城嘅誠品書局已經可以買到啦!左邊細盒嘅$130左右,右邊大盒嘅就$200左右,美食博覽價錢目前都仲未確定,不過sales姐姐話一定會平過零售價架。
講咗咁耐要介紹返新鮮嘅日本水果,阿媽一定鍾意。為大家介紹高盛有限公司(1D-E02)為大家香港市民送上日本新鮮入口嘅巨峰葡萄同麝香葡萄。雖然價格好似都未完全confirm ,不過就咁聽sales哥哥估計似乎都係一個好吸引嘅價錢。
美食博覽除咗日本嘢食之外當然仲有其他嘢食啦,不過我就真係試唔到咁多行唔到咁多,以上幾個我自己心水覺得好嘅各位記住試吓喇。

香港貿發局美食博覽2017

日期:2017年8月17至21日
時間:10:00-22:00
同場仲有家電家品博覽、國際茶展、美與健康生活博覽,一張門票可以滿足三個願望。

Related Posts

by
香港旅遊及生活部落客歷7年、曾多次受邀到日本及台灣採訪,​以日本深度遊、各種藝術文化交流、日本社會學等等個人分享及見解深受各個年齡層喜愛日本的人士歡迎。著有《Kiri的東瀛文化觀察手帳》。
Previous Post Next Post

Leave a Reply

Your email address will not be published. Required fields are marked *

0 shares