全世界以為去日本留學工作等於去吃喝玩樂享受人生，其實又唔係發咗達都係普通人家，每日迫地鐵食半價弁当嘅生活又點會係旅遊人士夜夜笙歌食おまかせ能夠體會呢？
尋日講返同一個朋友12年前東京見面一齊去千葉食拉麵，諗起兩年前走去探佢佢咪一樣食緊普通家庭餐廳。除非發咗達否則有乜可能日日拎住本旅遊書望下有乜嘢出名， 一千幾百港紙猶如垃圾咁食呢？慶幸日本就算係超級市場或者普通食肆，就算係普通人家心知叫做窮苦留學生，都未去到餐餐食垃圾食物嘅，叫做營養相對比香港好啲啦。
如果有時間嘅話最好當然係自己煮飯，超級市場大約五點幾六點就開始貼特價標籤，去到夜晚甚至會有半價嘅食物。不過油炸嘅食物放左幾個鐘都已經林晒唔好食，所以有時會買新鮮食材夜晚返去使用。再加上習慣咗過咗最佳尚未日期進食都唔會肚痛，所以就算過咗一兩日，可能我身體唔錯，都會繼續使用⋯
我仲好記得初初住喺板橋區嘅我最近嘅超級市場有時會有100日圓六隻雞翼，以前細個食得唔多救我食兩餐。另外再加上100日圓10隻嘅餃子，又可以食兩次早餐。隔離宿舍有個男仔同我講，你食咁少伙食費慳到好多錢，你就好啦。
係，對於旅遊人士來講留學嘅生活好似好普通，完全唔係佢哋想像嘅日本生活。拙作 #Kiri的東瀛文化觀察手帳 最後幾頁有篇文講到日本品牌出限定品推陳出新永遠買唔完，其實真係除咗瘋狂粉絲，以前讀書嘅時候真係唔會個個星期買新衫，真係唔使留錢生活咩。
香港人去到邊都鍾意食，其實旅遊人士對於全日本嘅知名餐廳美食可能比普通留學生知道得更加多。例如如果有個普通留學生住喺東京板橋區（其實就係最開頭嘅我喇），佢平日嘅活動範圍就係板橋區。佢可能知道超級市場福星期幾有相配印花，但係你突然間走去問區銀座有啲乜嘢和牛好食、嗰間乜乜美登利要排幾多個鐘，佢未必答到你。我哋喺香港都唔係日日食鏞記燒鵝、去陸羽飲茶。
如果大家有興趣，下次再講日本留學嘅時候喺日常生活中點樣慢慢搵到慳錢嘅方法。
（點都要帶定頭盔先！）
當然可能只係因為我唔捨得，可能人哋留學生活非常色彩繽紛，日日都食九大簋啦（攤手）。
實際上，作為一個喺香港咁多年嘅香港人，其實我真係未去過陸羽飲茶。龍景軒同國金軒呢兩間日本旅遊雜誌成日見到嘅香港飲茶首選推介，我都未去過架⋯⋯
圖：早幾個月去札幌旅行買咗個特價便當，這是晚餐。
